LAOAG CITY – Nagballaag manen ni Police Lt. Col. Adrian Gayuchan, Officer-In-Charge iti Philippine National Police iti ciudad ti Batac kadagiti addaan ti illegal nga aktibidad partikular iti illegal drugs a masapol nga agsardeng dan.
Inpetteng ni Gayuchan nga awan ti napintas nga ipaay ti panagusar wenno panaglako ti illegal a droga gapu ta daytoy ket mangdadael laeng ti pamilya ken ti bukod a bagi.
Inpaganetget ti opisyal a no itultuloy ti illegal nga aktibidad ken matiliw dagiti otoridad ket awan ti sabali a nakakaasi no saan a ti bukod a pamilya.
Innayon na a saan nga agkampante nga agtultuloy a mailimed ti illegal nga aktibidad gapu ta mismo metlaeng a dagiti kakadwa dagiti maseknan ti agisuplong kadagiti otoridad.
Inaramid daytoy ni Gayuchan kalpasan ti pannakatiliw dagiti dua a lallaki babaen iti naisayangkat a Anti-Illegal Drug Buy-Bust Operation iti Brgy. Magnuanag iti siudad ti Batac.
Nabigbig ti subject ti operasyon a ni Maynard Manglan-lan, agtawen ti 31, naasawaan, driver iti lokal a gobierno, ken residente iti Brgy. Bil-loca, idinto a ti kadua na ket ni Justine Gongora, agtawen ti 22, baro, awanan trabaho ken residente iti Brgy. Rayuray iti nasao a siudad.
Nakumpiskar manipud iti subject ti 16 a pedaso ti plastic sachet a naglaon iti maatap a shabu, maysa a ribu a pisos a nausar iti operasyon ken sumagmamano a drug paraphernalia kas iti aluminum foil ken improvise tooter.
Mainaig iti daytoy, dagiti nakumpiskar a maipagarop nga illegal a droga ket agdagsen ti 5 a gramo ken mapattapatta nga agbalor ti P27,200.
Rumrumuar a ti pagal-alaan ti subject ti operasyon ket iti ili ti Badoc.
Iti agdama, nagtalinaed ti subject iti kuerpo ti Philippine National Police iti siudad ti Batac para iti naan-anay nga imbestigasion ken pannakapila ti kaso kontra kenkuana.
