LAOAG CITY – Nadungpar ti maysa a motorsiklo ti chief of police iti ili ti Pinili a ni Police Major Jephre Taccad.
Nabigbig ti nakamotorsiklo a ni Joffrey Gamponia, agtawen ti 35, karpintero ken residente iti Barangay Gabut Sur iti ili ti Badoc.
Iti inisyal nga imbestigasyon, nangiyuswat ti Oplan Sita ti PNP-Pinili ken pagsarsardengen ti hepe ni Gamponia ngem maipagarop a nagderderetso isut gapuna a nadungpar na ni Taccad.
Naamoan a ti nasao a nakamotorsiklo ket awan ti helmet na ken iti pannakadungpar na ken ni Taccad ket naipurwak iti sumagmamano a metro ken nagsagabaan na ti sugsugat kangrunaan na iti ulo na.
Nagsagaba met ti sugat ti hepe iti nagduduma a paset ti bagina ken natukkol ti akin-kannigid a saka na.
Agpada a naitaray dagiti dua iti Karmelli Clinic and Hospital Inc. Iti Barangay Apatut-Lubong iti ili ti pinili ngem naiyakar da iti Mariano MArcos Memorial Hospital and Medical Center iti ciudad ti Batac.
Saan pay a masinunuo no ania ti kondisyon ti nakamotoriklo ngem adda ti rimuar a report a maipagarop nga awan pay ti poot na agpapan ita.
