LAOAG CITY – Inlawlawag ni Police Major Manuel Refuerzo, Station Chief iti Laoag International Airport- Philippine National Police -Aviation Security Group ti napasamak no apay naikkan ti citation ticket ti nakaparada a police mobil iti likod ti Capitolyo Probinsyal.
Daytoy ket kalpasan a naalaan ti video iti panangticket ti maysa a traffic enforcer iti nagluganan ni Police Corporal Erald Tersol.
Segun ken ni Police Major Refuerzo, binaon na ni Police Corporal Tersol a mapan iti Treasury’s Office iti Capitolyo Probinsyal tapno adda iti ilakadna a napateg a banag.
Kunana a saan a naripar ni Tersol ti signage a No Parking gapu ta naiyakar iti nakaipanan ti nasao a signage ken agdardaras daytoy.
Inbatadna a nagbayag iti agarup maysa nga oras a nakaparada ti nasao a police mobil rason a naikkan ti ticket daytoy.
Nupay kasta, kunana a nakasarita dan ti PNP Traffic Division ken awan iti binayadan da.
Kabayatanna, dimmawat iti dispensar ni Police Corporal Tersol iti saan a husto a panangiparada na ti police mobil.
