LAOAG CITY – Tinamaan ti Russian missiles ken drones ti Polish fighter jets iti kabisera ti Ukraine a Kyiv.
Basar iti State Emergency Service ti Ukraine, inpakaammo ti militar ti Poland a ti air force daytoy ket nangaramid “preventative” a sungbat tapno ma-secure ti airspace daytoy kalpasan a pimmusay ti maysa nga indibidual ken 28 a dadduma pay ti nasugatan iti Kyiv.
Naikeddeng a makipagkinnita ni Ukrainian President Volodymyr Zelensky ken ni United States President Donald Trump idiay Florida inton bigat.
Nupay kasta, gapu iti baro a tignay ti Russia, inulit ni Zelensky a saan a kayat ti Russia a palpasen ti gubat ti gangandatenda nga usaren ti tunggal gundaway tapno maikaitunda ti riribuk iti Ukraine.
Inbatad ni Zelensky a nangiwayat ti Russia ti agarup 500 a drone ken 40 a missiles nga agturong iti Kyiv a mangtar-target iti enerhia ken imprastraktura ti sibilian.
Makita kadagiti ladawan dagiti pasdek ti apartment nga adda dagiti dadakkel nga abut ken dagiti maur-uram a pagtaengan.
Mainaig iti daytoy, inrakurak ni Kyiv Mayor Vitali Klitschko a napukawan ti suplay ti kuriente dagiti rinibribu a pasdek no sadinno a naruay ti awanan ti pagpapudot gapu ta agtultuloy a bumabbaba ti temperatura a nangitunda ti nakaro a lamiis.
Kabayatanna, segun iti State Emergency Service ti Ukraine nga adda ti 68 nga indibidual ti naibakwit manipud iti maysa a retirement home iti daya a distrito ti Darnytskyi.
