LAOAG CITY – Patien ni Professor Karl Lenin Benigno, maysa nga analyst iti Northwestern University ditoy siudad ti Laoag a saan a rumbeng a maikkat ti party-list system ditoy pagilian.
Kuna a daytoy ket gapu ta isu ti pakaipresentaran ti policy making.
Inbatad na a para kenkuana ket awan serbi na ti kongreso nu mabaybay-an ti interest dagiti awanan ti pribelehiyo ken underrepsented a kas iti marginalized sector.
Segun ken ni Lenin a ti nasken nga aramiden ti gobierno ket maarisit a naimbag dagiti party-list nga agap-aplikar iti COMELEC tapno saan a maabuso.
Kuna na a masapol a makita nu legitimate ti maysa a partylist kangrunaan kadagiti miembro daytoy.
Innayun na a nasken a manayunan dagiti nagduduma a mekanismo a masursurot para iti pannakapili dagiti party-list.
Immunan nga inlawlawag ni Lenin a ti party-list system ket isu ti mangipasigurado ti pagsayaatan dagiti grupo a nabaybay-an ken maitakder da ti bukod da a paglintegan iti pagpandayan linteg.
Inbunannag na a ti kangrunaan a kwalipikado a party-list ket dagiti marginalized sector wenno mangiprespresentar kadagiti urban poor, rural poor, mannalon, babbai, agtutubo ken dadduma pay a sector a nababay-an babaen iti gobierno.
Maipalagip nga adda dagiti suhestiyon maipanggep iti posible a pannakaikkat ti party-list system ditoy pagilian.
Daytoy ket gapu iti pakaammo ti Election watchdog Kontra Daya a 120 manipod kadagiti 177 a party-list groups ket naduktalan a bukbuklen dagiti political clans ken dadakkel a businesses pakairamanan dagiti incumbent local officials, connections iti government ken military, unknown wenno unclear advocacies ken representations kasta pay dagiti addaan ti pending court cases ken criminal charges.
