LAOAG CITY – Mamati ni Prof. Herdy Yumul, maysa a Political Analyst ti Mariano Marcos State University a napapanawen ita ti pannakailungalong ti Anti-taray bill iti Senado.
Daytoy ket kalpasan a kalikagom ni Senador Raffy Tulfo nga imbestigaren ti Senado dagiti arogante ken snob nga empleado ti gobierno bayat a kitkitaenna ti naig-iget a wagas ken dusa kadagiti mangmangged iti gobierno a saan a nasayaat ti panangtratoda kadagiti umili.
Segun ken ni Yumul, nasken laeng a maaprobaran daytoy tapno adda met ti pagbutngan ken pagnakman dagiti empleado ti gobierno a saanda nga agaramid ti pakaibabainan dagiti tao nga agkamang kadagiti opisinada tapno agpatulong kadakuada.
Inbatadna nga apaman a naan-anay a maaprobaran daytoy a gakat ket adda ti maited a proteksion kadagiti maseknan a biktima ti misconduct, harassment ken human rights violations.
Inlawlawagna a nasayaat gapu ta napapanunutan daytoy ni Sen. Tulfo tapno maikkan metten ti pagmennamennaan dagiti arogante a mangmangged ti gobierno nga arig ket narigat a maasitgan gapu iti kinatangsit dagitoy.
Innayonna a saan met ketdi amin nga empleado ti gobierno ket managpabain ken naturay gapu ta mamati nga ad-adu latta dagiti nasisingpet ken naaanus a mangmangged ti gobierno a mangasikaso kadagiti agpatpatulong kadakuada.
