LAOAG CITY – Nag-courtesy call ni Mr. Andrew Bowes, Political Counselor iti British Embassy ken ni Mayor Michael Marcos Keon.
Inbatad ti Mayor a kinalikaguman laeng ti nasao a Political Counselor nga inyam-ammo ti bagina.
Kunana nga agdama a bumisbisita ni Bowes kadagiti amianan a siudad tapno mangipasdek kadagiti diplomatic ties.
Inlawlawagna a ginundawayanna nga indanon dagiti agdama a proyekto ditoy siudad ti Laoag kas ti umas-asideg a pannakalukat ti SM ken ti dakkel a pannakapabaro ken pannaka-construction iti aglawlaw iti Diocese of Laoag.
Inpakaammona nga agtultuloy ti national 4PH project iti Brgy. Talingaan nga addan iti 4,600 low-cost units.
Malaksid iti daytoy, inpadanon pay ti Mayor ti plano ti Aboitiz Group of Companies a mangbangon ti solar farm ditoy siudad ti Laoag pakairamanan ti singasing ti Megaworld Corporation para iti pannakapadur-as ti maysa nga ili a masarakan iti agsumbangir ti Fort Ilocandia Resort Hotel iti Brgy. Calayab.
