LAOAG CITY – Inlawlawag ni Dr. Charito Malicad, ti city information officer ditoy siudad ti Laoag ti naiyalokar a pondo para iti Miss Laoag 2022.
Kuna ni Malicad a gapu iti pandemiya ket basbassit ti pondo para iti nasao a pageant ken umabot laeng iti P1.485 million a pisos.
Inpakaammo na a manipod iti nasao a pondo ket 376,500 a pisos ti nailatang para iti stage saan a kas iti sayangguseng a minilyon ti budget para iti daytoy.
Innayun na a ti dadduma ket para kadagiti kandidata, judge ken sabali pay a kasapulan iti pageant.
Immunan nga inbatad ni Malicad nga iti baet nga adda ti pandemiya ket kalikagum ti siudad a napintas ken nagarbo ti agbalin a pabuya a pageant nu pay babaen laeng iti online.
Naamoan a naiyuswat ti pre-pageant idi Pebrero 10 iti Forth Ilocandia ditoy siudad.
Innayun met ti Malicad a maipabuya ti pre-reocrded Coronation Night intuno Pebrero 18 wenno Pebrero 19.
