LAOAG CITY – Inlawlawag ni Barangay Chairman Joseph Bitagon iti Barangay Balatong ditoy ciudad ti Laoag a saan a mapukpukaw 90 a ribo a pisos a pondo manipud iti popularity contest a naiyuswat dua a tawenen ti napalabas.
Segun kenni Bitagon, patyen na nga adda kenni Barangay treasurer Joel Albano ti nasao a kantidad.
Ummuna iti daytoy, kiniddaw ni Bitagon kenni Albano a maiyaramidan ti financial statement ti pondo nga usaren da tapno sukatan ti cyclone wire ti lawlaw ti pagbasketbolan iti nasao a barangay.
Nupay kasta, kuna ni Bitagon a saan a naipresentar ni Albano ti financial statement gapo ta manarimaan ti cash audit na iti Commission on Audit (COA).
Kuna pay ti kapitan a saan na nga ammo no sadinno ti nakaidulinan ti kwarta ngem mamati nga iggem daytoy ni Albano.
