LAOAG CITY – Aminado ni Mayor Joefrey Saguid iti ili ti Dingras a saan nga immanay ti pondo da para iti panaggatang ti baro a dekorasyon iti nasao nga ili ita a paskua.
Segun kenni Saguid, daytoy ket gapo iti panagngato ti presyo ti krudo ken kuryente rason a limitado ti pondo a nausar da para iti dekorasyon ita a paskua.
Nupay kasta, kuna ti mayor nga ado dagiti timmulong a kailyan da tapno manayunan dagiti dati a dekorasyon iti Farmers Plaza ken iti sangwanan ti Munisipyo, ken dadduma pay a paset ti ili.
Inlawlawag na a gapo iti tulong dagiti nagduduma nga indibidual ken grupo ket nakaukkon da ti agarop 100 a ribo a pisos.
Naamoan nga adda pay ti dati nga utang ti lokal a gobierno nga isu ti bayadan da nangruna ket bimmaba ti pondo ti 26 a milyon a pisos para iti tawen 2023.
Kabayatanna, kunana a sagsaganaan ti lokal a gobierno ti Pakape, maysa kadagiti tradisyonen ti ili ti Dingras no mangrugi ti Misa de Gallo wenno Disyembre 16 agingga iti Disyembre 24.
