LAOAG CITY – Adda ti nainayun a 150 a milyon a pisos a nayun a pondo para iti flood control project iti Barangay Gabu Norte ditoy ciudad ti Laoag.
Daytoy ti inbatad ni District Engr.Glenn Miguel iti 1st Engineering District ti Department of Public Works and Highways (DPWH) ditoy ciudad.
Inlawlawag ni Miguel a nanayunan ti pondo tapno matarimaan pay ti dike iti pungto na nga asideg ti runway ti Laoag International Airport (LIA).
Kuna na a babaen iti daytoy ket masigurado a maprotehiran dagiti residente iti nadakamat a barangay ken ti runway ti nasao nga erupuerto.
Innayon na a nasurok a maysa a kilometro ti kaatiddog na ti matarimaan a dike iti lugar.
Maipalagip nga immuna a nailatang ti 50 a milyon a pisos para iti pannakatarimaan a dagus ti dike iti lugar kalpasan a nadadael bayat ti iduduprak ti Bagyo Egay idi 2023.
