LAOAG CITY – Inbatad ni Mrs. Josefina Acar, ti officer in charge ti Brgy. Bimmanga, Currimao a saan da a makairuar iti pondo iti barangay gapo ta ni Kapitan Marsha Taclibon a signatory iti tseke ket nakabalod.
Segun kenni Acar, mismo a ti kapitan ti mangab-abunar iti honorarium kasta met iti mausar para dagiti proyekto ken programa ti barangay da.
Kunana no adda ti kasapulan da a pondo iti barangay ket mapan da alaen iti pagtaengan ti kapitan nga isu pay laeng ti usaren da.
Inlawlawag na nga iyuray da agingga iti Disyembre a makaruar ti kapitan tapno makapirma kadagiti tseke ken mairuar da met ti pondo iti barangay da ken masukatan ti inyabunar mismo ti opisyal.
Mainaig iti daytoy, kuna ni Acar a saan da met a mabalin a piliten ti kapitan a mang-certify tapno agsukat ti signatory iti tseke ken saan da a mapilit nga agresign.
Naamoan a ti rason ti kapitan a saan na a kayat nga agbaliw ti signatory iti tseke ket agsubli met kas opisyal agingga a makaruar iti pagbalodan.
Kabayatanna, kuna ni Atty. Gerald Gallardo iti Department of the Interior and Local Government (DILG) ditoy probinsya a binagaan na metten dagiti opisyal iti barangay pakairamanan ti Mayor ti ili no ania dagiti nasken nga aramiden da.
Innayon na a ti laeng solusyon ket ti panagcertify ti Kapitan a ti 1st kagawad nga agbalin a signatory tapno makairuar da iti pondo.
