LAOAG CITY – Inparuk-aten ti Department of Budget and Management (DBM) ti P36.450 bilyon a pondo para iti implementasyon dagiti nayun a sweldo dagiti empleyado ti gobyerno.
Inbatad ni Department of Budget and Management Secretary Amenah Pangandaman a ti nasao nga addang ket paset ti Salary Standardization Law.
Immapela daytoy kadagiti mangimatmaton iti nagdudiuma a departamento ken ahensya nga ipatungpal ti salary adjustment.
Adda ti pakabuklan a 308 a government departments ken ahensiya ti makaawat ti nasao a pondo.
Ti umuna a bansada ti salary increase idi Enero 2024 ket retroactive kas maiyataday iti Executive Order 64 nga inparuk-at ni Presidente Ferdinand Marcos Jr idi Agosto ita a tawen idinto a ti maikadwa a bansada ket intono Enero 1, 2025, ti maikatlo a bansada ket Enero 1, 2026 ken ti maudi a paset ti sweldo ket intono Enero 1, 2027.
Maipalagip a ti pannakaipangato ti sweldo ket pakairamanan ti tinawen a National Expenditure Program.
