LAOAG CITY – Adda ti apagapaman a panagdur-as ti kasasaad iti salun-at ni Pope Francis.
Basar iti Holy See Press Office, no idasig kadagiti naglabas a lawas ket addan ti apagapaman nga improvements ti motor ken respiratory functions ti agtawen ti 88 a Santo Papa.
Nakissayan metten ti panagusarna ti non-invasive mechanical ventilation iti rabii ken high-flow oxygen therapy met iti bigat.
Iti panagturogna iti napalabas a rabii ket saanen a kinasapulan pay nga agusar ti mechanical ventilation ken imbes ket mangnamnamada laengen iti high-flow oxygen.
Naammoan nga uray simmmayaaten ti situasion ti Santo Papa ket agtultuloy latta a mabanbantayan babaen kadagiti doktorna.
Nakipaset pay ti Argentinian Pope iti panagkararag ken sumagmamano a nalalag-an a trabaho.
Naigetna a sursuruten ti diyeta no sadinno a napalubusan daytoyen a mangan kadagiti solid food.
Maipalagip nga idi Pebrereo 14 idi intaray ti Santo Papa iti Gemelli Hospital idiay Rome gapu iti pneumonia iti agsinnungbangir a barana.
