LAOAG CITY – Inrakurak ti Vatican a mangipakpakitan ni Pope Francis ti “good response” iti sagsagabaen na a sakit a double pneumonia, ken in-inuten a sumaysayaat ti kondisyon na.
Ti agtawen ti 88 a Santo Papa ket addan ti tallo a lawas na nga agpapaagas iti Gemelli Hospital idiay Roma kalpasan a na-diagnose ti nakaro nga impeksyon iti panaganges na a kasapulan iti agtultuloy a pannakaagas na.
Iti kaudian nga update manipod iti Vatican, nagtalinaed a natalged ti salun-at ti Santo Papa kadagiti naglabas nga aldaw a mangipakpakita iti positibo a panangawat na kadagiti medical intervention.
Naamoan pay nga awanen ti gurigor ti Santo Papa ken nagtalinaed a nasayaat dagiti blood test na.
Mainaig iti daytoy, agtultuloy a maipapaayan ti supplemental oxygen ti Santo Papa para iti panaganges na no sadinno nga iti aldaw ket agus-usar ti bassit a tubo iti babaen ti agongna idinto a ti rabii ket agus-usar ti non-invasive mechanical ventilation bayat a matmaturog.
