LAOAG CITY – Inrakurak ni Pope Francis a ti inkari ni United States President Donald Trump a large-scale deportation operation ti undocumented migrants ket maysa a ‘kalamidad.’
Sipud idi panawen ti kampanya ket nagtalinaeden ti takder ni Trump nga iti panagsubli na iti White House ket iprayoridad na a papanawen ti 11 a milyon nga undocumented migrants iti Amerika.
Maipalagip nga inawat ti Santo Papa iti Vatican ni Trump iti umuna a termino na iti White House idi 2017 ken dinillaw na dagiti anti-migrant a pagannurutan daytoy.
Kabayatanna, manamnama nga iti panagtugaw ni Trump kas baro a mangidaulo iti Amerika ket mangiparuk-at kadagiti executive order iti dadduma pay nga aspeto a pagannurutan iti imigrasyon ken ad-adalen na ti panangideklarar ti national emergency a mangipalubos kenkuana a lukatan ti Pentagon resources.
