LAOAG CITY – Nagsarita iti telepono ni United States President Joe Biden ken Pope Francis.
Basar iti White House, tinalantan ti dua ti panangitandudo ti kinappia ita nga Holiday season.
Nagyaman ni Biden ti Santo Papa gapu iti agtultuloy nga adbokasia daytoy tapno makissayan ti panagrigat iti intero a lubong.
Karaman payen ti panagpursige ti Santo Papa tapno ilungalong ti karebbengan ti tattao ken protektaran ti religious freedoms.
Inawat ni Biden ti imbitasion ti Santo Papa nga agturong iti Roma inton Enero 9-12.
Naammoan a kabayatan ti kaaddana idiay Rome ket maaddaan met ti agsina a panagtataripnong ti Presidente ti Estados Unidos ken da Italian President Sergio Mattarella ken Italian Prime Minister Giorgia Meloni.
Daytoyen ti mabalin a maudi a gundaway nga agkita da Pope Francis ken Biden kas Presidente ti Estados Unidos gapu ta manamnama nga agngudon ti termino daytoy inton Enero 20 a suktan isuna ni United States President elect Donald Trump.
