LAOAG CITY – Nagpanawagan ni Pope Francis kadagiti gobierno ken pakairamanan dagiti pharmaceutical industry nga agtignay tapno makaala dagiti bakuna kontra iti monkeypox virus nangruna kadagiti pagilian a nakaro a naapektaran.
Inallukoy ti Santo Papa dagiti gobierno ken private industry a mangiburay ti teknolohia ken available treatments tapno awan ti asinoman ti kurang iti serbisio medikal.
Inraman ni Pope Francis iti weekly prayers-na dagiti biktima ti nasao a virus kangrunaanna ti Democratic Republic of Congo.
Indeklara ti World Health Organization ita a bulan ti global health emergency.
Naammoan a ti panagngato ti kaso ti monkeypox manipud iti Democratic Republic of Congo nga agturong iti sabali a pagilian idiay Africa.
Nagpanawagan met ti World Health Organization para iti nalawlawa a produksion ken panangipaay kadagiti bakuna kontra iti monkeypox virus.
Ti virus ket nagwaras iti Democratic Republic of Congo a nakatayan ti nasurok 570 a tattao ita a tawen.
Naipadamag metten ti outbreak ti virus idiay Burundi, Kenya, Rwanda ken Uganda manipud idi Hulio.
Ti umuna a kaso iti Europe ket naipadamag iti Sweden iti napalabas a lawas.
Kabayatanna, posible nga agwaras ti virus manipud kadagiti ayup a maiyakar kadagiti tattao ngem mabalin met a tao iti tao iti babaen ti close physical contact.
