LAOAG CITY – Nagpanawagan ni Pope Francis iti panaglippas ti riribuk idiay Gaza.
Iti panagruarna iti ospital kalpasan ti sumurok maysa a bulan iti balay-pagagasan ket saanna a nalipatan nga ikararagan ti gubat idiay Gaza.
Inbatadna a napateg nga adda ti napintas a panagsarita ti agsinnungbangir a grupo.
Ti nasao a panawagan ket kagiddan ti naminsan manen a panangraut ti Israel iti Gaza kalpasan ti immuna a naipatungpal a ceasefire deal.
Nagyaman ti agtawen ti 88 a Santo Papa kadagiti nangipadanon ti panagkararagda para iti alisto a panagimbagna.
Kuna ti doktorna a ni Dr. Sergio Alfier nga uray saan pay a naan-anay a nagimbag ti Santo Papa ket awan met ti pneumonia daytoy isu a napalubusan nga agawiden.
