LAOAG CITY – Nagyaman ni Pope Francis kadagiti miembro ti medical team idiay Vatican gapu iti panangisalakanda ti biagna.
Nagtalinaed ti sumurok maysa a bulan ti Santo Papa iti Gemelli hospital idiay Rome gapu iti sakit daytoy a double pneumonia.
Dumanon iti 70 a doktor ken staff ti Gemelli hospital ti nagatendar iti taripnong a nangobserbar iti salun-at ti Santo Papa iti uneg ti 38 nga aldaw.
Daytoyen ti kabayagan a nagtalinaed iti ospital ti Santo Papa iti uneg ti 12 a tawen sipod nagtugaw daytoy iti puesto.
Naammoan nga uray nakaruaren iti ospital ti Santo Papa ket inabisoanna isuna latta ti doktor nga aginana pay laeng.
Saan met a masinunuo ti Vatican no agatendar kadagiti aktibidad ti semana ti Santo Papa.
