LAOAG CITY – Naminsan manen a nagpanawagan ni Pope Francis ti dagus a tigil putukan idiay Lebanon gapu iti nakaro a tension iti nagbaetan ti Israel ken Hezbollah.
Inaramid ti Santo Papa ti panawagan iti misana iti King Baudouin stadium idiay Brussels, Belgium nga inatendaran ti nasurok 40 a ribu a tattao.
Inbatadna a ti Lebanon ket mensahe ngem arig ket nakaam-amak a mensahe gapu iti dakkel nga epekto daytoy iti populasion.
Inawaganna daytoy nga immoral ti awan sarday nga ar-aramiden nga airstrike ti Israel iti Gaza.
Maipalagip a namin-adu a daras a nagpanawagan ti agtawen iti 87 a Santo Papa ti kinakappia iti Middle East ken ti panangwayawaya dagiti hostage ti Hamas iti Gaza.
