LAOAG CITY – Inpetteng ni Pope Leo XIV a ti pagsayaatan dagiti umili idiay Venezuela ti rumbeng nga agpannuray kalpasan a nakautibo ti presidente ti pagilian a ni Nicolas Maduro iti maysa nga operasyon nga insayangkat ti Estados Unidos.
Kalpasan ti kararag iti Angelus iti St. Peter’s Square, inbatad ti kaunaan nga American Pope a masapol nga unaen ti pagsayaatan dagiti Venezuelan, imbes a ti interes wenno konsiderasyon.
Segun ken ni Pope Leo, ti pannakaiyakar ti turay ti pagilian ket masapol a mangilukat ti dalan a maiturong iti panagpatingga ti kinadamsak ken maitandudo ti hustisia ken kapia.
Inpetteng na pay ti kinapateg ti panangrespetar ti soberanya ti Venezuela, ipatungpal ti agdama a linteg ken linaon ti Konstitusyon, ken salwadan ti karbengan iti human ken civil rights iti tunggal umili.
Ti rakurak ti santo papa ket kalpasan ti pannakakautibo ni Maduro iti ciudad ti Caracas a kabisera ti Venezuela babaen kadagiti US special forces.
Immunan nga inrakurak ni US President Donald Trump nga idaulwan ti Washington ti Venezuela ken usaren na dagiti reserba a langis ti pagilian.
