LAOAG CITY – Bumisita ni Pope Leo XIV idiay Turkey para iti kaunaan a foreign trip-na kalpasan ti innem a bulan a nagtugaw kas Santo Papa.
Agturong ni Pope Leo XIV idiay Turkey para iti Christian anniversary ken kalpasanna ket bumisita ti Santo Papa idiay Lebanon kalpasan ti Israeli airstrikes iti kabiserana a Beirut.
Naammoan a dagiti panagbisita kadagiti kapada a pagilian ket orihinal a plinano ti pimmusay a ni Pope Francis ngem ti pakabuklan a tema ket inaramid ni Pope Leo apaman a simrek iti balkonahe ti St. Peter’s Basilica kalpasan a naelektaran idi Mayo.
Mainaig iti daytoy, agtataripnong da Pope Leo ken dagiti lider kadagiti dadduma a Christian traditions tapno selebraran ti anibersario iti ancient council a nangrugi nga addan ti 1,700 a tawen ti napalabasen.
Bisitaen pay ti Santo Papa ti Blue Mosque idiay Turkey kas kadagiti inaramid dagiti immuna kenkuana nga isuda Pope Francis ken Pope Benedict XVI.
Adda ti maisayangkat a panagtataripnong nga idauluan ti Santo Papa kadagiti dadduma pay a lider ti relihion iti maysa a tignay ti inter-religious dialogue sakbay nga agturong iti maikadua a paset ti biahena.
Kabayatanna, inrakurak ti Vatican a ti plano a panagbisita ni Pope Leo XIV ket saan a nabalbaliwan kalpasan ti Israeli airstrikes iti Beirut iti kallabes.
