LAOAG CITY – Inpasigurado ni Ms. Janet Retamal, mangidadaulo ti Population on Commission ditoy siudad ti Laoag ti pannakaipaay ti naan-anay a tulong wenno suporta kadagiti ubbing nga inna wenno dagiti teenage mother.
Inbatadna a masapul a maisuro kadakuada ti life skills para iti ad-adda a mapasayaat ti bagi ken biag dagitoy.
Inlawlawagna a no nagbiddot ti maysa nga indibidual ket kasapulan ti naiget a panangtarabay kadakuada a saan ketdi nga idadanes dagitoy.
Kunana a masapul nga adda dagiti maiyuswat a programa para kadagiti ubbing nga inna tapno maammoanda dagiti rumbeng nga aramidenda kalpasan ti panagpasngayda.
Innayonna a nakasagana ti opisinada a mangbayabay kadakuada tapno maiturong dagitoy iti napinpintas a masakbayan.
