LAOAG CITY – Kalikagum ti Population on Commission ditoy siudad ti Laoag a maisuro ti maipanggep iti contraceptive measures kadagiti ubbing nga ina.
Segun ken ni Mrs. Janet Retamal, mangidadaulo iti nasao nga opisina, manarimaan ti pannakikoordinarda kadagiti maseknan a pangopisinaan tapno ad-adda a napintas ti pannakaipatungpal ti programada.
Inbatadna a babaen iti daytoy ket maipaayan ti wagas dagitoy a makasubli iti panagadal ken mabantayanda a naimbag dagiti annakda.
Inlawlawagna a dakkel a makatulong kadagitoy ti panagusar ti implanon tapno malapdan ti insigida a panagsikog manen dagiti ubbing nga ina kalpasan ti panagpasngayda.
Kunana a ti implanon ket epektibo agingga iti tallo a tawen depende iti pammagbagi ti maysa a babai.
Innayonna a dagiti agkalikagum nga agpatudok iti daytoy ket mabalin nga agturongda laeng iti doktor.
