LAOAG CITY – Posible a makarekobren ti pork supply ditoy pagilian inton sumaruno a tallo a lawas, basar iti Department of Agriculture.
Segun ken ni Department of Agriculture Secretary Francisco Tiu Laurel Jr., dakkel ti nagbalin a konsumo iti napalabas nga holiday season isu nga apagapaman a bimmaba ti pork supply.
Inbatadna nga iti agdama ket in-inot nga agsubsublin ti normal a konsumo isu a posible a ngumaton ti supply ti karne ti baboy inton sumaruno a tallo a lawas iti tulong metten ti agtultuloy a local production ken umdas a volume ti imported pork.
Inlawlawagna nga uray limitado ti suplay ti karne ti baboy, nagtalinaed a natibker ti suplay kadagiti nagduduma a merkado publiko ditoy pagilian.
Kabayatanna, basar iti monitoring ti Department of Agriculture Bantay Presyo kadagiti tiendaan idiay Metro Manila, agay-ayam ti presio ti pork liempo manipud iti P370 agingga iti P450 iti kada kilo.
Dumanon met iti P330 agingga iti P400 iti kada kilo ti presio ti kasim.
