LAOAG CITY – Inaprobaranen dagiti agpanpanday linteg idiay Portugal ti panangpaiget kadagiti ubbing nga agusar iti social media.
Segun iti author ti linteg manipud iti Social Democratic Party (PSD) a dagiti agtawen ti 13 agingga iti 16 ket kasapulan pay laeng nga ipakada kadagiti nagannak kadakuada sakbay nga agusar ti social media.
Inbatadna a gagem daytoy tapno maiyadayo dagiti ubbing iti cyberbullying ken dagiti sumagmamano a klase ti krimen.
Agusar ti public system a Digital Mobile Key (DMK) dagiti nagannak tapno mapalubosan dagiti annakda nga ubbing.
Makatulong pay daytoy tapno ad-adda a maipatungpal ti agdama a lintegda a panangipawil kadagiti ubbing nga agtawen ti 13 ken agpababa nga agusar ti aniaman a klase ti social media.
