LAOAG CITY – Inalerton ti gobyerno ti Pilipinas ti counterparts na iti Portugal ken dagiti dadduma pay a pagilian tapno matunton ken maisubli ditoy Pilipinas ni dati nga Ako Bicol Party List Representative Zaldy Co, a naideklararen a pugante.
Immunan nga inbutaktak ni Justice Sec. Jesus Crispin Remulla a namonitor ti naudi a lokasyon ni Co iti Portugal.
Basar iti sekretaryo, amin a pagilian ken amin a centers for transnational crimes iti intero a lubong ket naimpormaranen mainaig iti pannaka-kanselar ti pasaporte ni Co.
Inadmitir ni Remulla a nabayag ken naginad ti proseso no maipapan iti international law, ngem makikokoordinar dan iti counterparts da.
Iti met biang ni Co, immunan a naglikudan na dagiti akusasyon kontra kenkuana, ken intudo na ni Presidente Ferdinand Marcos Jr. nga adda iti likudan ti maipagarop a P100 bilyon budget insertions iti 2025 national budget para iti infrastructure projects, nga inawagan met ti Malacañang nga awan ti pagibasaran ken agpapada a patta-patta laeng.
Maipalagip a maysa ni Co iti 16 nga akusado iti kaso a graft and malversation nga adda ti pakainaigan ti maanomaliya a flood control project iti Oriental Mindoro.
Manipod kadagiti pada nga akusado ni Co, siyam ditoy ti addan iti kustodyar ti gobyerno ken nag-plead ti not guilty iti Sandiganbayan.
