LAOAG CITY – Jeepney Association ti Laoag-Batac-Paoay a no ti transport strike laengen ti wagas tapno denggen ti gobierno ti arungaing da seknan iti modernization program ket posible a makipagpaset da.
Segun kenni Silvestre, no kasapulan nga iyuswat da daytoy tapno maipadanon ti rigat da nga agpaspasada ket posible a maiyuswat met daytoy.
Mainaig iti daytoy, kunana a gapo iti kangina ti modern jeepney ket saan da a kabaelan a bayadan nangruna ket agarop 800 a pisos ti maiyawid da para iti pamilya da no ikumpara iti nasurok sangaribo a pagbayad da iti kada aldaw iti modern jeepney.
Inpetteng na a saan nga umanamong iti modernization program gapo ta adda metten ti lugan da a pagpasada da.
Naamoan nga iti ruta da ket addan ti 19 a modern jeepney nga agpaspada.
Kunana nga adda ti naibaga idi nga adda ti ited ti gobierno a 160 a ribo a pisos kadakuada.
Kabayatanna, inbatad met ni Mr. Efren Corotan nga awan ti plano da a makipagpaset iti anyaman a transport trike gapo ta maparalisa laeng ti transportasyon ti Laoag-Gabu.
Dinakamat na nga iti agdama ket simmurot da metten iti panag-consolidate iti kooperatiba ken korporasyon.
Nupay kasta, kunana a ti maysa kadagiti kangrunaan a problema da ket ti modernization programa gapo ta awan met ti dakkel a mapaspastrek da ken ti binulan a panagbayad da ken adda pay ti pamilya a biagen da.
Inbaga na pay a saan laeng met nga isuda ti agpaspasada gapo ta adda met dagiti tricycle ken dagiti dadduma ket adda ti bukod na a lugan.
Innayon na nga adda met ti inpaay ti gobierno probinsyal a fuel subsidy iti napalabas nga aldaw a tallo a ribo a pisos kasta pay nga adda dagiti mangmangegan da nga adda ti ipaay ti gobierno national ngem saan na a masigurado no makaanay met daytoy.
