LAOAG CITY – Kitkitaen ita ti posibilidad ti panangipila ti kaso a panaglabsing iti International Humanitarian Law kontra ken ni dati a Pres. Rodrigo Duterte.
Inbatad ni Justice Secretary Jesus Crispin Remulla, nakikinnata daytoy iti mangidadaulo ti Department of Justice Task Force a nabilin tapno imbestigaran ti war on drugs ti napalabas a Duterte administration ken daytoy ti ad-adalen ti task force.
Kinumpirmaran ti sekretario a kangrunaan nga im-imbestigaran ti task force ti dati a Presidente.
Nabukel ti nasao a task force tapno tiliwen dagiti perpetrator ti extra judicial killings (EJK) iti kangitingitan ti nadara a war on drugs.
Inbatad ni Sec. Remulla, ti linteg ti International Criminal Court ti us-usarenda ita ngem inlawlawag ti sekreatario nga agsina dagiti posible a kaso a maipila iti korte ditoy Pilipinas maipanggep iti war on drugs ken saan nga ag-overlap iti International Criminal Court.
Inlawlawagna nga uray saanen a miembro iti International Criminal Court ti Pilipinas ket mabalin latta a maiyaplikar ti “spirit of complementarity,” maysa a principle ti maysa kaso ket saan nga aw-awaten ti International Criminal Court no daytoy ket im-imbestigaranen ti maysa nga estado nga addaan ti hurisdiksion daytoy.
Maipalagip nga immunan nga inrakurak ni dati a Presidente Duterte iti panagdengngeg ti House Quad Committee idi Nobiembre 13 a nakasagana a makitinnulong iti imbestigasion ti International Criminal Court ken kiniddawna nga iyal-alisto ken rugianda a dagus ti imbestigasionda ken no mapaneknekan a guilty isuna ket nakasagana daytoy a maibalod iti tungpal-biag.
