LAOAG CITY – Inbatad ni Barangay Chairman Melvin Santos iti Barangay 1, San Lorenzo ditoy ciudad ti Laoag a saan a maliklikan nga addan to dagiti posible a madalapus a ligason dagiti kabarangayan na no marugyan ti pannakaimuntar ti solar street lights.
Segun kenni Santos, iti agdama ket saan da pay nga ammo no sadinno ti pakaikalyan ti poste dagiti street lights rason a saan da pay a masigurado no siasinno dagiti madalos ti ligason na.
Kunana nga adda dagiti sumagmamano a pagtaengan nga asideg iti kalsada no sadinno mabalin nga iti ligason da a mismo ti pakaipatakderan na.
Nupay kasta, patien na nga umanamong dagiti kabarangayan na gapo ta napintas daytoy ken dakkel a benepisyo para kadakuada.
Iti agdama, kuna ti kapitan a masansan ti panagkidda dagiti residente ti bombilya para kadagiti street lights a napundi.
Naamoan nga umabot iti 90 nga solar street lights ti maimuntar iti nadakamat a barangay no sadinno ket 25 a metro ti kaadayo na iti tunggal maysa.
