LAOAG CITY – Inpakaammo ni Mrs. Divine Sevilla, maysa a Counseling Professional ken ti mangidadaulo iti Speak Up I’m Here ti gobierno probinsial a posible nga adda ti epektona iti mabuybuya iti online ti napasamak a panagbekkel ti maysa nga ubing nga agtawen ti walo iti ili ti Narvacan idiay probinsia ti Ilocos Sur.
Gapu iti daytoy, maladingitan la unay ni Mrs. Sevilla iti nasao nga insidente nangruna ket maibilang ti maseknan nga ubing kas Generation Alpha no sadino masansan dagitoy nga agus-usar ti selpon wenno aniaman a klase ti gadgets.
Segun kenkuana, mabalin a dagiti mabuybuya iti online ket dakkel ti posibilidadna a tuladen wenno aramiden dagiti ubbing banag a masapol ti naiget a panangbayabay dagiti nagannak kadagiti annakda tapno maliklikan iti kapada nga insidente.
Mainaig iti daytoy, inpakaammo ni Sevilla nga agtawen ti pito agingga walo ti kaubingan a naipasidong iti opisinada pakairamanan dagiti sumagmamano pay nga agtutubo nga agtawen ti 12 agpangato.
Inbatadna a masapol ti naan-anay nga umiso a panangisuro kadagiti annak maipanggep iti panagusar iti mobile devices.
Innayonna a nasayaat no mangiyalokar ti oras dagiti nagannak para kadagiti annakda tapno adda ti oras met ti panagkakaduada nga agkakapamilia pakairamanan ti oras a panagay-ayamda kadagiti padada nga ubbing.
Immuna iti daytoy, dead on arrival ti maysa a lalaki nga ubing a Grade 2 pupil kalpasan a nagbekkel iti ili ti Narvacan, Ilocos Sur.
