LAOAG CITY – Inbatad ni Engr. Roy Tomas, ti city engineer ditoy siudad ti Laoag a posible nga adda ti panagkurang ti pondo para iti gasolina iti opisina na apaman a matapugan ti maikapat a kwarter iti daytoy a tawen 2022.
Kuna na a daytoy ket nu bilang agtalinaed a re-enacted ti budget ditoy siudad ti Laoag kageddan ti agtultuloy a panagngato ti presyo dagiti produkto a petrolyo.
Segun ken ni Tomas, adda laeng ti pito a milyon a pisos a nabati iti pondo manipod iti 2021 re-enacted budget.
Naamoan nga iti kada aldaw ket 200 a litro ti gasolina ti makonsumo dagiti equipments ti city engineering office.
Kabayatanna, kuna ni Tomas a nu bilang maaprubaran ti 2022 budget ditoy siudad ket adda ti nakasagana a walo a milyon a pisos a pondo para iti gasolina iti opisina na.
