LAOAG CITY – Inlawlawag ni Brgy. Chairman Rodolfo Ramirez iti Brgy Salet Bulangon ditoy ciudad ti Laoag a posible nga iti Laoag City Public Market and Commercial Complex iti nakaalaan ti virus ni IN-C362.
Ni IN-C362 ket maysa a lalaki nga agtawen ti 61 nga agtagikua ti maysa a convenience store.
Segun kenni Ramirez, daytoy ket gapu ta adayo iti pagtaengan ti pasyente kadagiti immunan a nagpositibo ti COVID a kabarangayan da met laeng a da IN-C209 ken IN-C233.
Inbatad na a posible nga iti tiendaan ti nakaalaan ni IN-C362 ti virus gapu ta adda pay ti pwesto da iti nasao a lugar.
Kunana a medyo narigat a madeterminar dagiti close contact dagitoy agsipod ta saan da nga ammo no siasino dagiti napan gimmatgatang iti pwesto da iti along national highway iti boundary ti Salet Bulangon ken Lagui Sail.
Iti agdama ket agtultuloy ti panangisayangkat da ti contact tracing kadagiti nakapulapol ti nagpositibo a pasyente.
Maipalagip a ni IN-C362 ket karaman kadagiti narandom test kalpasan a nagpositibo da IN-C209 ken IN-C233.
Ditoy nga inrekomendar da nga amin nga agtagikua ti pasdek negosyo a kabarangayan da ket maipadalan iti swab test ket ditoy a naduktalan a maysa ni IN-C362 kadagiti nagpositibo ti COVID.
Iti agdama ket pinarikepan da pay laeng iti pasdek negosyo ti pasyente ken nabalakadan dagiti karruba da a saan pay laeng a rumrumuar.
