LAOAG CITY – Inlawlawag ni Atty. Ferdinand Ignacio, a possible a maipila ti reklamo nga obstruction of justice kontra kadagiti agipopost iti ladawan iti manarimaan a maiyus-uswat a lehitimo a checkpoint dagiti kameng ti Highway Patrol Group, PNP ken LTO kadagiti kalsada.
Daytoy ket mainaig pay laeng iti Facebook Page wenno Group nga LTO Alert Ilocos Norte no sadino a pakaipakaammoan kadagiti miembro nga adda ti checkpoint iti maysa a lugar.
Iti pananganalisar ni Atty. Ignacio iti maar-aramid iti nasao a page wenno dagiti maipost iti social media seknan iti nasao nga iysu ket panangsabotahe ti operasyon dagiti otoridad a mangtiliw wenno mangsita kadagiti agiturturong iti motorsiklo nga awanan iti lisensya wenno rehistro ti motorsiklo.
Kuna na a no naamuan dagiti otoridad ti pannakaipost ti panagcheckpoint da ket mabalin a mangiyuswat da iti imbetigasyon ken agkalap kadagiti ebidensya ken mangipila ti reklamo kontra kadagiti nagipost.
Inlawlawag ni Atty Ignacio a no ti immunan a nadakamat ti Highway Patrol Group a cyberlibel ti makitkita da nga ireklamo ket agdepende iti inpost dagiti tattao no pudno wenno saan ti maibagbaga.
Immunan a naalaan ti Bombo Radyo Laoag ti reaksiyon ni Police Executive Master Sergeant Eduardo Mabutas Jr., Assistant Team Leader ken chief invest iti Highway Patrol Group ditoy probinsya a mabalin a sumango iti cyberlibel ti administrator.
Naluksaw ni Mabutas gapu ta imbes a makasita da kadagiti agiturturong iti motorsiklo nga awanan ti lisensya wenno expired a rehistro iti motorsiklo ket saanen gapu ta naipost daytoy iti social media.
