LAOAG CITY – Kalikagum dagiti sumagmamano a residente ti Barangay 1 ditoy siudad ti Laoag a maiyakar ti poste ti kuriente a nakapatakder iti uneg iti maysa a pagtaengan iti kabiitan a panawen.
Segun ken ni Mr. Sonny Madamba, maysa kadagiti residente iti nasao a barangay, nabayagen a naipatakder ti nasao a poste ti kuriente agingga nga immadu dagiti nagipatakder ti pagtaengan ket naokuparan daytoy.
Inbatadna a naobserbaranna pay a marigatan dagiti empleado ti Ilocos Norte Electric Cooperative wenno INEC a mapan ag-reading gapu ta nakarikep wenno naka-lock ti pagtaengan.
Inlawlawagna nga idi pay napalabas a tawen 2024 idi in-report-na daytoy a banag iti Ilocos Norte Electric Cooperative ngem awan pay ti nagbalin a tignayda agpapan ita a gundaway.
Maipalagip a mangipatulod ti Sangguniang Panlungsod ti surat iti Ilocos Norte Electric Cooperative kalpasan nga adda ti poste a nakapatakder iti uneg ti pagtaengan iti Barangay 1 ditoy siudad kangrunaanna iti likud ti galyeraan.
Immuna iti daytoy, segun iti Presiding Officer a narisgo wenno fire hazard daytoy a situasion gapu kadagiti live wires a nakaikabit.
