LAOAG CITY – Mangipatulod manen ti sabali a surat ti konseho iti Ilocos Norte Electric Cooperative kalpasan nga adda ti indanun a reklamo dagiti residente iti Barangay Calayab ditoy ciudad ti Laoag maipanggep iti poste ti kuryente nga adda iti tengnga ti kalsada iti paset ti Sitio 5 iti nadakamat a barangay.
Inpetteng ti konseho a narisgo ken makaitunda ti disgrasya ti nasao a poste.
Segun iti konseho, inbatad dagiti residente iti nadakamat a barangay a nabayag dan nga indanun ti nasao a problema iti kooperatiba ngem agpapan ita ket awan pay ti nagbalin nga addang da.
Kabayatanna, inpakaammo ti sekretaryo iti konseho nga awan pay ti sungbat ti kooperatiba iti surat nga immunan nga inpatulod da.
Innayon na a mangipatulod da manen ti surat iti Ilocos Norte Electric Cooperative mainaig iti dua a pakaseknan dagiti residente ditoy ciudad.
Maipalagip nga immunan a naidanon iti konseho ti problema iti Barangay 1 ditoy ciudad mainaig iti kaadda ti poste a nakapatakder iti uneg iti pagtangen partikular iti likod iti galyeraan.
