LAOAG CITY – Kalikagum ni Mrs. Divina Sevilla, maysa a Counseling Professional ken mangidadaulo ti Speak Up I’m Here ti Gobierno Probinsial nga adda ti maiyestablisar a poster materials kadagiti nagduduma a Local Government Units (LGU’s) ditoy Ilocos Norte tapno adda ti pakakitaan dagiti hotline iti opisinada.
Segun kenkuana, daytoy nga addang ket namunganay kalpasan nga adda dagiti suicide incident a mapaspasamak ditoy probinsia, banag nga ibilang na a makaalarma.
Gapu iti daytoy, kunana nga ar-aramidenda amin ti kabaelanda tapno makatulong kadagiti iti publiko nangruna kadagiti adda iti sangsangoena a pannubok wenno parikot iti biag.
Inlawlawagna a nakalukat iti hotline ti opisinada 24/7 tapno maakomodar dagiti kakailian a makapaspasar ti problema a makaitunda ti mental health issues ken dadduma pay.
Naiget ti pananggutigot na kadagiti umili a makipagpartisipar kadagiti maiyus-uswat nga aktibidad iti programa da tapno matulungan dagitoy ken maliklikan ti ad-adda a pannakapasar ti depression ken stress.
Kabayatanan, mangnamnama ni Sevilla a mausar ti hotline-da iti umiso a wagas ken saan a paglulukoan kas dagiti agar-aramid ti prank calls.
