LAOAG CITY – Kinumpirmaran ni Fire Inspector Edison Reyes, ti Fire marshall iti ili ti Piddig ti napasamak nga uram iti maysa a poultry farm iti Brgy. Maruaya iti nasao nga ili.
Segun ken ni Reyes, agarup alas diyes itay bigat a naawat da ti report mainaig iti uram.
Inbatad na a dagus da a nagresponde ken nadanunanda a dakkel ti apoy iti poultry farm.
Gapu iti daytoy, kuna na a dimmawat ti tulong iti BFP Solsona, BFP Sarrat ken BFP-Laoag tapno alalisto a masebseban ti uram.
Kuna na nga immabot ti agarop maysa nga oras sakbay a naideklara ti fire out.
Mainaig iti daytoy, inbaga ni Reyes a mapatta-patta nga agdagup ti 300,000 ti nadadael iti nasao nga uram.
Immunan nga inpakaamo ti fire Marshall a naaramid manipod iti materyales nga alisto a mauram ti poultry farm ken naangin rason nga alisto a nagramram ti apoy.
Innayun na a basat iti panagimbestigarda ket adda ti immunan a naguraman ti ruot iti asideg ti poultry farm ken isu ti maatap a namunganayan ti uram.
Kabayatanna, naamoan a ti nasao a poultry farm ket kukua ti agnagan ti Gina Natividad, asawa ni Romulo Anacleto, ti biktima ti gandat a panagpapatay iti kallabes.