LAOAG CITY – Inkari ni Presidente Ferdinand Marcos Jr. nga agpuunan iti job-generating infrastructure ken social protection programs tapno maipababa pay ti poverty rate ti pagilian iti 9% inton 2028 kalpasan a naipadamag a ti poverty rate ket bimmaba iti 15.5% iti napalabas a tawen.
Iti video message ni Pres. Marcos, inbatadna a 2.5 milyon a Pilipino ti nagnam-ay manipud iti kinakurapay ken 10.9% ti pamilia ti nagtalinaed a marigrigat.
Inulit manen ti Presidente ti dinakamatna iti maikatlo nga State of the Nation Address wenno SONA-na iti napalabas a bulan a ti amin a sakripisio iti administrasionna ket “useless” no saan a sumaysayaat ti biag dagiti tattao.
Inpasingked ni Pres. Marcos iti publiko nga itultuloy ti gobierno ti panagpuunan iti job-generating infrastructure, social protection programs, health ken education para kadagiti amin a Pilipino.
Kabayatanna, inrakurak ti Presidente a dimmur-as ti ekonomia ti Pilipinas ti 6.3% iti second quarter ti agdama a tawen maidasig iti napalabas a tawen no sadinno a kunana a daytoy ti kangatoan kadagupan iti Association of Southeast Asian Nations (ASEAN).
