LAOAG CITY – Ginutigot ni Philippine Red Cross Chairman Richard Gordon dagiti pagilian a mangiwayatda ti regular and joint disaster-response exercises ken scenario planning tapno masigurado ti alisto a panangipatulod ti tulong iti oras ti kalamidad ken aniaman a didigra.
Iti panagsarita ni Gordon iti ASEAN High-Level Meeting mainaig iti ASPECT Framework idiay Manila, inpettengna a masapol nga agsanay ken agtitinnulong dagiti pagilian sakbay pay a dumteng ti aniaman a krisis.
Inlawlawagna a kalikagum ti tunggal miembro a pagilian iti ASEAN a maaddaan ti maysa nga organisado, alisto ken agtitinnulong a pagilian iti panawen ti krisis.
Mainaig iti daytoy, inrekomendar ti mangidadaulo ti Philippine Red Cross ti regular a diyalogo ken simulation exercises iti nagbaetan dagiti ASEAN Red Cross ken Red Crescent Societies tapno mapadas ti kabaelan dagiti tunggal pagilian iti panagawat ken panangipaay ti tulong.
