LAOAG CITY – Nakibinnulig ti Philippine Red Cross Ilocos Norte Chapter iti Provincial Government of Ilocos Norte para ti pannakaimplementar ti saliva testing kas alternatibo ti RT PCR test.
Daytoy ket kabayatan ti pannakatratar ti gakat a nakaisagudayan ti pannakaipaay ti bileg ken ni Gob. Matthew Marcos Manotoc a sumrek ti katulagan iti Phil. Red Cross para iti panangisayangkatda ti “saliva COVID test” kadagiti kakailian.
Segun kenni Mrs. Edna Orcino, administrator ti Phil. Red Cross Ilocos Norte Chapter, inpannakkelna nga “accurate” ti resulta ti “saliva COVID test”.
Impalgakna nga adda ti kumpirmasyon ti Food and Drug Administration ken dagiti dadduma pay a maseknan nga ahensia pakaseknan ti kinasamayna.
Segun ken ni Orcino, pinasingkedan dagiti nadakamat nga ahensia a daytoy ket maikunsiderar a “gold standard” a kas met laeng iti RT PCR test.
Inlawlawagna a ti laeng pagdumaan dagiti nasao a “test” ket ti maala nga “specimen”.
Imbatadna a sipud idi Marso 31 ket nangiyetnag ti Department of Health wenno DOH ti maysa a “circular” a mangiyinpuersar iti sumagmamano a protocol ken pagannurutan iti operasyon ti “saliva RT PCR test” nga isaysayangkat ti Phil. Red Cross wenno PRC.
Inbunannagna nga iti agdama ket adda ti sangapulo ket tallo a molecular laboratories ti PRC iti intero a pagilian.
Kunana nga iti agdama ket nakasagana dagiti PRC provincial chapter kas iti PRC Ilocos Norte Chapter nga agawat kadagiti pasiente nga agkalikagum a maipadalan iti “COVID-19 test” babaen iti pannakausar ti “saliva” wenno katay.
Segun kenkuana, nakasagana ti opisinada a mangidiaya ti serbisioda manipud iti alas otso t bigat agingga ti alas tres ti malem manipud iti aldaw ti lunes agingga iti sabado.
Innayonna a nalaklaka ti magasto babaen iti “saliva COVID test” no maidasig iti RT PCR.
Kabayatanna, napagnunoan dagiti kameng ti SP a kalikagumda a mangappropriate ti 500 ribo a pisos para kas advance payment kadagiti agbalin a pasyente nga agsaliva test.
Itay kallabes, inrakurak ti PGIN a mabalinen ti saliva test result ti maipakita iti border control ngem iti biang ti MMMHMC ket RT PCR test pay laeng ti iyus-uswatda.
