LAOAG CITY – Kinumpirmaran ni Atty. Juanito Antonio, maysa kadagiti legal counsel ni dati a Dingras Mayor Marynette Gamboa a naitantan ti pre-trial iti sangsangwen a kaso ti dati nga opisyal.
Ni Gamboa ket napilaan ti kaso a murder kalpasan a naitudo a maipagarop nga utek iti pannakapapatay ni dati nga Ilocos Norte Electric Cooperative Pres. Rey Ruiz idi 2009.
Segun kenni Antonio, kalpasan ti ummuna a pannakausig ni Gamboa ken indawat da a maitultuloy ti pre-trial ngem nagkiddaw ti Prosecution a maitantan daytoy intono Oktubre 27.
Kunana a daytoy ket gapo ta saan a nakasagana ti Prosecution seknan iti pannakaipresentar kadagiti testigo ken testimonya nangruna ket dagiti dadduma a nangitudo kenni Gamboa ket inbabawi da ti testimonya da ken natay ti dadduma.
Inpetteng na a kalikagom da a maidaras ti pannagna ti kaso ni Gamboa gapo ta daytoy ket dentention prisoner ken concern da pay iti salun-at daytoy ngem napagdesisyonan a maitantan ti pre-trial.
Nupay kasta, kunana a plano da ti agpila ti Petition for Bail gapo ta ti maysa kadagiti ipunpunto da ket no bilang ma-acquit ti dati a Mayor ket naipaidam ti waya-waya kenkuana.
Mainaig iti daytoy, kuna na a mabalin a mangkita pay ti prosecution kadagiti dadduma nga ebidensya a mangipaneknek nga adda ti pakainaigan ni Gamboa iti nasao a krimen.
Iti laksid daytoy, inbatad ni Antonio a posible a marigatan a mangala ti prosecution kadagiti agtestigo gapo ta dagiti dadduma kadagitoy ket natayen kas kenni Jun Bagamaspad.
Malaksid iti daytoy, inbabawi pay ni Noel Aureliano ti ummuna a testimonya na a ni Gamboa ti maipagarop a nangbayad kenni Bagamaspad tapno papatayen ni Ruiz.
Gapo iti daytoy, kunana a kumpiyansa da a mapaneknekan da nga inosente ni Gamboa iti pannakapapatay ni Ruiz.
Kabayatanna, napan pay iti korte ti pamilya ni Gamboa kas iti ina ken kakabsat na idinto nga iti biang ni Ruiz ket inbagi lattan ti prosecutor.
Maipalagip a ni Gamboa ket natiliw babaen iti bileg ti warrant of arrest idiay Calamba, Laguna ken iti agdama ket adda iti kustudiyar ti Bureau of Jail Management and Penology (BJMP) iti ciudad ti Batac.
