LAOAG CITY – Inkeddeng ti Korte Suprema inton sumaruno a bulan ti preliminary conference mainaig iti petision a mangkukuestionar iti 2025 General Appropriations Act.
Basar iti Korte Suprema, maisayangkat inton Marso 5 ti preliminary conference nga imbes nga idi kalman, Pebrero 28.
Ti nasao a petision ket inpila da dati nga Executive Secretary Vic Rodriguez, Congressman Isidro Ungab, Rogelio Mendoza ken dadduma pay iti napalabas a bulan no sadinno nga inpettengda a maikanniwas iti Konstitusion ti naaprobaran a 2025 National Budget.
Nailanad ditoy dagiti maipagarup a blangko nga items iti bicameral conference committee report ken ti saan a panangilatang tip undo iti PhilHealth.
Maikanniwas pay iti linteg ti nangato nga alokasion a limmabes iti rekomendasion ti Presidente ken panangipaay ti nadakdakkel a pundo iti imprastraktura maidasig iti edukasion.
Naammoan a karaman kadagiti respondent ti petision da House Speaker Martin Romualdez, Senate President Francis Escudero ken Executive Secretary Lucas Bersamin nga immunan a nabilin nga agisubmitir ti orihinal a kopya ti 2025 General Appropriations Bill ken Enrolled Bill.
Kabayatanna, alas dos ti malem inton Abril 1 ket naikeddeng ti oral arguments a maisayangkat iti Supreme Court Baguio City Session Hall.
