LAOAG CITY – Inlawlawag ni Doctor Imelda Pablico, pediatrician iti Mariano Marcos Memorial Hospital and Medical Center iti ciudad ti Batac dagiti sumagmamano a makaigapu no apay nga adda dagiti maipasngay a maladaga a premature.
Iti programa a Doctor Bombo, inbatad ni Doctora Pablico a dagiti kangrunaan a rason no apay nga adda ti maipasngay a premature ket gapu iti panagngato ti blood pressure ti ina, nangato ti blood sugar na, addaan ti bleeding disorder ken mainfection.
Malaksid iti daytoy, mabalin pay nga agpasngay ti maysa nga ina a kurang ti bolan wenno lawas na gapu iti panagsigarilyo, panaginom ti arak, panagusar iti illegal a droga, stress ken dadduma pay.
Segun ken ni Pablico, dagiti maipasngay a premature a maladaga ket dakdakkel ti posibilidad na a maapektaran ti panagdengngeg wenno panagkita na, dumakkel ti puso ken mabalin pay nga agsagaba iti anemia.
Gapu iti daytoy, inbalakad ti Doctor a masapol ti regular a panagpacheckup ken masapol nga annadan ti bagi tapno saan nga agsakit kabayatan ti panagsikog agingga a maipasngay ti anak.
