LAOAG CITY – Pinirmaanen ni President Donald Trump ti spending bill para iti pannakalukat manen ti gobierno ken agpatinggan ti maibilang kas kabayagan a shutdown iti pakasaritaan ti Estados Unidos.
Pinirmaan ni Trump ti short-term budget para iti naan-anay a linteg, sumagmamano nga oras kalpasan a nagbotos ti House of Representatives iti 222-209 pabor iti daytoy nga addang.
Napasamak daytoy, dua nga aldaw kalpasan nga inaprubaran ti Senado iti isu metlaeng a package.
Iti Oval Office, inbatad ni Trump nga agsublin ti normal nga operasyon ti gobierno kalpasan ti nakaro a pannakaapektar dagiti amerikano iti uneg ti 43 nga aldaw a shutdown ti gobierno ti Amerika.
Naruay a serbisyo iti gobierno ti nasuspenso sipud idi Oktubre.
Umabot met ti agarop 1.4 million a federal employees ti nagtultuloy a nagtrabaho nga awan ti naawat da a sweldo.
