LAOAG CITY – Ado dagiti nakigtot iti nagbalin a mensahe ni Presidente Rodrigo Duterte iti United Nations General Assembly (UNGA).
Daytoy ti inbatad ni dati a Bayan Muna Rep. Atty. Neri Colmenares, ti chairman ti National Union of Peoples Lawyer (NUPL).
Segun ken ni Colmenares, arigna nagbaliktad ti presidente gapu ta iti kallabes ket grabe ti panangatake na iti UN ken nagado a pagilyan ti nakariri na no sadinno a kasapulan ti Pilipinas ti tulong gapu iti mapaspasaran a covid-19 pandemic.
Nupay kasta, kuna ni Colmenares nga iti panagsarita ti presidente iti UN assembly ket naibaga na a dakkel ti panangrespeto na ti Human Rights ken ti panagawat na iti sarita na ket masapol nga agpapagayam amin.
Inbaga pay ni Colmenares a personal a gura ti ad-adda nga agpannuray ken ni Presidente Duterte imbes a ti kasapulan ti umili.
Mainaig iti daytoy, inpetteng ni Colmenares a saan a pudno a tinakderan ti presidente ti arbitral award kontra iti China.
Kabayatanna, saan a naliklikan ni Colmenares ti nangbabalaw iti naibaga ni Presidente Duterte a ti laeng bakuna ti solusyon tapno maipababa ti kaso ken maparmek ti covid-19 ditoy pagilyan.
Inkompara ni Colmenares ti pagilyan a Vietnam ken Thailand nga iti baet nga awan pay ti bakuna kontra iti covid-19 dagiti nasao a pagilyan ket kinabaelan da nga inpababa ti bilang dagiti makapkaptan ti makapatay a virus.
Innayon na a masapol nga admitiren ni Duterte nga adda ti madi na ti panangtratar na ti kaso ti covid-19 ditoy Pilipinas isut gapuna a masapol nga agpatulong ti presidente iti dadduma a pagilyan ken ti UN.
