LAOAG CITY – Nabanglo latta ti nagan ni Presidente Rodrigo Duterte uray ado dagiti mangbabbabalaw ken ado dagiti mangibagbaga a saan a nasayaat ti response ti administrasyon na iti covid-19 pandemic.
Segun kenni Mr. Herdy Yumul, sociologist iti Mariano Marcos State University (MMSU), uray anya a survey ket nangato latta ti trust rating ti presidente ken agtalek latta dagiti kaadoan a Pilipino kenkuana.
Nupay kasta, kunana a ti problema ket dagiti adda iti babaen ti Presidente nga inawagan na a palpak dagiti plano da mainaig iti pandemya.
Dinakamat na ni Department of Health (DOH) Secretary Francisco Duque III a palpak ti tignay wenno plano na ngem saan na nga ammo no apay a saan nga ibbatan ti presidente isuna.
Maysa pay kadagiti inbatad na a palpak ket ni Department of Interior and Local Government (DILG) Secretary Eduardo M. Año mainaig met iti barrier kadagiti motorsiklo.
Innayon na a masdaaw isuna gapo ta uray direkta a makita a palpak ti trabaho dagiti dinakamat na nga opisyal ti gobierno ket dagiti pay laeng tattao ti babalawen wenno pabasolen da.
