LAOAG CITY – Inbilin ni Presidente Ferdinand Marcos Jr. ti “lifestyle check” kadagiti opisial ken empleado ti gobierno mainaig iti agtultuloy nga imbestigasion ti agdama nga administrasion gapu kadagiti maanomalya ken iregularidad kadagiti proyekto ti gobierno nga adda ti pakainaiganna iti flood control.
Daytoy a direktiba ni Presidente Marcos ket mangibilbilin a mangiwayat ti “lifestyle check” kadagiti opisial ken empleado ti gobierno manipud iti kangatoan agingga iti kababaan a posision.
Daytoy ti kinumpirmaran ni Palace Press Officer Usec. Claire Castro.
Inbatadna a daytoy ket kas paset ti naig-iget a panangikagumaan a masigurado ti integridad ken accountability iti uneg ti gobierno ken tapno masolbar dagiti alegasion ti korapsion.
Kabayatanna, ti lifestyle check ket maysa a proseso ti panangberipikar kadagiti sanikua, biruk ken panagbiag ti maysa nga opisial ti gobierno tapno maammoan no daytoy ket maiyannatop kadagiti deklarasion dagiti sanikua ken net worth.
