LAOAG CITY – Inmatangan ni Presidente Kim Jong Un ti pannakaiwayat ti dua a baro nga air defense missiles ti North Korea.
Basar iti impormasion, ti pannakairubuat ti defense missiles ket mangipaneknek a kabaelanna daytoy a dadaelen dagiti nagduduma a klase ti aerial targets-da pakairamanan dagiti drones ken cruise missiles.
Ti naisayangkat a test ket sumagmamano nga oras kalpasan a kinumpirmaran ti South Korea ti fired warning shots idi Martes kadagiti suldado ti North Korea nga apag-biit a bimmallasiw iti Demilitarized Zone (DMZ) iti nagbedngan ti dua a pagilian.
Segun iti United Nations Command, agarup 30 a suldado ti North Korea ti bimmallasiw iti nagbaetan ti North ken South Korea.
Mainaig iti daytoy, mangiwaywayat ti South Korea ken ti Estados Unidos ti large-scale joint military exercises iti rehion sipod idi Lunes.
Naammoan a manamnama nga agkita da United States President Donald Trump ken ti baro a Presidente ti South Korea a ni Lee Jae Myung iti summit inton Lunes idiay Washington.
Kabayatanna, nagsina ti North ken South Korea sipod nagngudo ti Korean War idi 1953.
